Sut i lenwi eich Ffurflen Lefi

Mae llenwi eich Ffurflen Lefi yn ofyniad cyfreithiol.  Mae’n sicrhau y gallwch gael gafael ar grantiau, cyllid a chymorth arall ar gyfer hyfforddiant.

Mae’r dudalen hon yn cynnwys gwybodaeth i’ch tywys drwy bob adran o’ch Ffurflen Lefi.

Gallwch gael gwybod sut i lenwi’r canlynol:

• Manylion eich busnes gan gynnwys y prif weithgaredd (Adran 1)
• Aelodaeth o Sefydliadau Rhagnodedig (Adran 1a)
• Enwau llawn unig fasnachwyr neu bartneriaid (Adran 1b)
• Taliadau i weithwyr (Adran 2)
• Taliadau Cynllun y Diwydiant Adeiladu (CIS) (Adran 3)
• Sefydliadau (Adran 4)
• Manylion cyswllt ar gyfer y lefi (Adran 5)
• Datganiad (Adran 6)

Manylion eich busnes gan gynnwys y prif weithgaredd (Adran 1)

Gwnewch yn siŵr bod yr wybodaeth yn yr adran hon yn gywir. Dylai hyn gynnwys enw eich busnes os yw’n berthnasol, cyfeiriad eich busnes a’ch rhif cofrestru.

Os oes unrhyw wybodaeth yn anghywir, rhowch groes drwyddi ac ychwanegu’r manylion newydd.  Os yw’ch rhif cofrestru yn anghywir, cysylltwch â levy.grant@citb.co.uk a rhoi gwybod i ni.

Ychwanegwch eich rhif Tŷ’r Cwmnïau os oes gennych chi un. Dim ond os yw’ch busnes wedi’i ymgorffori fel cwmni cyfyngedig fydd gennych chi rif Tŷ’r Cwmnïau.

Mae cwmni yn endid cyfreithiol sydd â hunaniaeth ar wahân i’r rheini sy’n berchen arno neu’n ei redeg.

Beth yw fy mhrif weithgaredd?

Y gweithgaredd sy’n cynrychioli eich busnes orau ddylai’r prif weithgaredd fod. Os yw wedi newid, mae’n bwysig eich bod yn nodi hyn ar y Ffurflen Lefi.

Mae rhestr o’r prif weithgareddau ar gael ar y dudalen Pwy ddylai gofrestru â CITB?.

Aelodaeth o Sefydliadau Rhagnodedig (Adran 1a)

Rydym yn ymgynghori’n rheolaidd â’r Sefydliadau Rhagnodedig, sy’n cynrychioli cyflogwyr o bob rhan o’r diwydiant ar faterion allweddol sy’n ymwneud â’r Lefi, gan gynnwys cyfraddau a throthwyon y Lefi.

Mae Sefydliad Rhagnodedig yn cyfeirio at sefydliad a fydd yn siarad ar ran ei aelodau yn gyfunol ynghylch y cynigion Lefi. Mae’n debygol o fod yn ffederasiwn neu’n gymdeithas rydych yn aelod ohonynt yn y diwydiant adeiladu.

Yn y gwagle a ddarperir, nodwch unrhyw Sefydliadau Rhagnodedig rydych yn perthyn iddynt yn Adran 1a. Mae’r wybodaeth hon yn ein galluogi ni i gyfrifo lefel cynrychiolaeth cyflogwyr pob sefydliad.

Nid ydym yn pasio unrhyw wybodaeth rydych chi’n ei rhoi i ni ymlaen at Sefydliadau Rhagnodedig.

Enwau llawn unig fasnachwyr neu bartneriaid (Adran 1b)

Os ydych chi’n unig fasnachwr neu’n bartneriaeth, gwnewch yn siŵr bod yr wybodaeth yn yr adran hon yn gywir. Os oes unrhyw wybodaeth yn anghywir, croeswch drwyddi ac ychwanegu manylion newydd.

Taliadau i weithwyr, gan gynnwys cyfarwyddwyr sy’n cael eu talu (Adran 2)

Blwch A

Rhowch gyfanswm eich taliadau trethadwy gros i bob gweithiwr ar y gyflogres, gan gynnwys cyfarwyddwyr sy’n cael eu talu.

Y ffigur hwn yw cyfanswm y flwyddyn ar eich cofnodion cyflogres y byddwch wedi’i gyflwyno i CThEF.

Mae angen i chi gynnwys:

• Pob taliad TWE i staff gan gynnwys cyfarwyddwyr sy’n gweithio, staff gweinyddol a chlerigol, ac unrhyw staff sydd wedi gadael

Ni ddylech gynnwys:

• Pensiynau
• Tyniadau partneriaid ac unig fasnachwyr
• Cyfraniadau Yswiriant Gwladol (NIC) y cyflogwr
• Difidendau
• Taliadau i weithwyr hunangyflogedig, is-gontractwyr neu staff asiantaeth.

Blwch B

Rhowch nifer cyfartalog y gweithwyr ar y gyflogres. 

Dylid cyfrif gweithwyr rhan-amser fel ffracsiynau priodol o weithwyr amser llawn.

Ni fydd nifer y gweithwyr sydd wedi’u rhestru ar eich Ffurflen Lefi yn effeithio ar eich Asesiad Lefi, ond mae’n ein helpu ni gyda data’r gofrestr ac yn ein helpu i ganfod gwallau cyffredin ar gyflwyniadau.

Beth am gwmnïau segur?

Mae’n rhaid i gwmnïau segur lenwi Ffurflen Lefi flynyddol.  Llenwch y ffurflen gan sicrhau eich bod yn rhoi ‘Segur’ fel y rheswm dros y sero ar y gyflogres yn Adran 2, neu fel arall gallwch farcio

‘Segur’ yn glir ar y ffurflen gan sicrhau eich bod yn llenwi'r datganiad yn Adran 6.

Taliadau Cynllun y Diwydiant Adeiladu (CIS) (Adran 3)

Caiff rhan o'r Lefi ei chyfrifo yn seiliedig ar daliadau a wneir i is-gontractwyr CIS sy’n derbyn taliadau net (trethadwy).

Ni fydd y Lefi yn cael ei asesu ar unrhyw daliadau a wneir i is-gontractwyr CIS sy’n derbyn taliadau gros

Blwch C

Rhowch eich cyfanswm ar gyfer y dreth a ddidynnwyd gan is-gontractwyr drwy CIS. Gellir cael y ffigur hwn drwy gyfrifo cyfanswm y ffurflenni contractwyr ar-lein/CIS300 fesul 12 mis y mae eich busnes wedi’u cyflwyno i CThEF yn ystod y flwyddyn.

Blwch D 

Rhowch gyfanswm eich holl daliadau (cyn didyniadau) i’r holl is-gontractwyr CIS. Gellir canfod y ffigur hwn yn y golofn sydd â’r pennawd ‘Cyfanswm y taliadau a wnaed (peidiwch â chynnwys TAW)’ ar y ffurflenni contractwyr ar-lein/CIS300 fesul 12 mis rydych wedi'u cyflwyno i CThEF yn ystod y flwyddyn.

Ydych chi wedi didynnu treth ar gyfradd o 30% oddi ar rai is-gontractwyr, neu bob un ohonynt, sy’n cael eu talu drwy CIS?

• Os mai ‘Naddo’ yw’ch ateb i’r cwestiwn hwn, dilynwch y cyfarwyddiadau ym mlwch E a mynd ymlaen i'r adran nesaf
• Os mai ‘Do’ yw’r ateb i’r uchod, dylech lenwi blwch F, gan roi eich taliadau i is-gontractwyr trethadwy, llai deunyddiau

Cyfrifo Blwch F – eich taliadau i is-gontractwyr trethadwy, llai deunyddiau.

I gyfrifo Blwch F yn gywir, adiwch at ei gilydd gyfanswm y taliadau a wnaed i’r holl gontractwyr lle gwnaethoch ddidynnu treth, a thynnu cost eu deunyddiau (y talwyd amdanynt gan bob is-gontractwr) o bob llinell ar eich ffurflenni contractwyr ar-lein/CIS200 o fis Mai i fis Ebrill.

Dylai’r ffigur terfynol gynnwys y rheini sy’n cael eu trethu ar 20% a’r rheini sy’n cael eu trethu ar 30% i roi asesiad manwl gywir i chi.

Sefydliadau (Adran 4)

Caiff sefydliad ei ystyried yn endid yn unol ag ystyr masnachol tŷ busnes neu sefydliad masnachol ar wahân. Nid yw’n cynnwys adrannau mewnol, lleoliadau swyddfeydd ar wahân, safleoedd adeiladu, iardiau ac ati.

Yn y gwagle a ddarperir, rhowch gyfanswm y sefydliadau sydd wedi’u cynnwys yn y ffigurau ar eich Ffurflen Lefi.

Os oes gennych fwy nag un sefydliad adeiladu, rhowch y manylion ar gyfer pob un ar dudalen 2 neu ar daflen ar wahân wedi'i hatodi’n sownd i’ch Ffurflen Lefi. Os nad oes gan eich sefydliad adeiladu Rif Cofrestru CITB ar hyn o bryd, neu os nad ydych yn ei wybod, gadewch y golofn hon yn wag.

Dylai hyn gynnwys unrhyw fusnes nad yw wedi'i nodi yn Adran 1 sydd wedi’i gynnwys yn eich taliadau i weithwyr (Adran 2) a thaliadau i is-gontractwyr drwy CIS (Adran 3).

Manylion cyswllt ar gyfer y lefi (Adran 5)

Ewch ati i ddiwygio’r manylion cyswllt ar gyfer y Lefi os ydynt yn anghyflawn neu llenwch nhw os ydynt yn wag, er mwyn i ni allu parhau i gyfathrebu â’r unigolyn iawn. 

Datganiad (Adran 6)

Pan fydd y ffurflen wedi’i llenwi, ewch ati i lofnodi a chwblhau’r datganiad.  Mae angen i’r datganiad gael ei lofnodi gan gyfarwyddwr, ysgrifennydd y cwmni, neu rywun sydd mewn safle â chyfrifoldeb tebyg.